Notebook Ownership Programs 2022

熒幕點揀?

簡單建議：

要幾大就買幾大 + 分辨率 1920 * 1080 或以上，其他嘢唔識就唯有唔好諗。



更多廢話

1. 大小
都係嗰句，睇你要幾大，就買幾大。


2. 用乜面板(panel)
最平嘅係TN面版，唔好嘅地方係可視角度低，即係要喺正個mon睇，啲顏色同亮度先正常 ，總之避之則吉。(不過今年嘅機好似冇TN。)

現時最常見notebook面板嘅，係IPS，好處有可視角度大，反應時間雖然一般，但文書機夠用，睇戲亦冇問題，而漏光(黑暗畫面下，某啲背光走咗出嚟，令畫面局部變灰色/光咗)就係另一常見問題。

特性同IPS相似嘅有VA面板，入面再細分MVA/PVA等等，對比度比IPS好，但可視角度同返應時間又差過IPS，近年notebook少咗見用VA。

題外話：好多廣告都話IPS可視角度達178度，其實唔係咁啱，當你望IPS Mon時偏離中軸約45度，已經好明顯會有變色同變暗嘅問題，而OLED較好，而停產咗嘅Plasma係最好，好懷諗我部Plasma...

如果計色最靚，咁要講OLED，另外，佢反應時間非常快，黑位夠黑 (每點光暗可獨立控制，要發光時發光，冇光時就閂咗佢，真正做到全黑時無光，TN/IPS要靠filter喺唔要光嘅像素遮咗佢，但好多時有落差，遮唔晒做唔到全黑)。唔好處係OLED會有烙印，即係同一個位長時間顯示同一樣嘢時，會燒咗個印喺度，點都整唔走，而且OLED比TN/IPS等更耗電，又反光，用喺notebook係咪好，見人見智。
又係題外話：好多人講嘅LED電視，其實係講緊LCD背部，用嚟發光嘅技術(而LED背光發揚光大之前，常用嘅係用Cold Cathode Fluorescent Lamp嚟做背光，即係LCD背後有幾支光管咁嘅嘢。現時較新嘅技術係包括Micro / Mini LED，想知係乜就自行Google吧)。


3. 分辨率
分辨率，我慣咗叫resolution。現時面板，resolution最起碼要買1920 * 1080起，即係打撗有1920點，打直有1080點。係咪越多點越好？咁又未必，越多像素，畫面望落去越仔細係啱。但係玩遊戲時，越多像素，咁你嘅GPU要更powerful先處理到更大量嘅數據，而且同size/亮度嘅面板，一般嚟講，越高resolution越食電。


4. 比例
以前CRT(大牛龜年代)，Mon係4:3，後來興16:9，現時就轉緊去16:10。個人覺得16:9 / 16:10都冇問題，但唔少人prefer 16:10，原因係睇文件較放便，而用得16:10嘅機，應該屬於較新嘅設計等。


5. 鏡面/霧面
簡單啲講鏡面反晒光但清啲，霧面掉轉。我自己只買霧面，原因係用鏡面反光嘅機時，就算實內燈光照落淺色衣物，都會有個影，搞到睇得好辛苦！坐窗邊就更加睇到想跳樓！


6. 光亮度/對比度
呢樣咁基本，唔駛講喇掛？


7. 更新率
更新率，即係每秒入面，畫面更新嘅次數，最基本係60Hz，即係每秒可以改變60次，文書無乜所謂，打FPS games就有影響，簡單啲講，高啲打機會冇咁lag，但仲要配合其他技術，例如G-Sync / FreeSync等，呢度唔係討論技術嘅，就講到呢度。


8. 色域 (Color Space)
呢個世界，人眼可見光得三隻色，但可以組合到無限咁多隻眼色。不過，我哋啲熒幕就無咁勁，只能夠顯示到某部份嘅頻色，咁點知邊隻熒幕顯顯示嘅色較多？行內有幾隻常用嘅標準，例如sRGB / NTSC，兩者並唔能直接比較。對新手而言，總之冇寫明，或寫45% NTSC，通常都唔係好嘢，不過講返轉頭，對文書機嚟講，用乜大影響，我自己用電腦多數都係睇白底黑字嘅嘢，乜色又有乜所謂？(如果你知乜嘢係sRGB / NTSC，就應該識得揀。)


9. 色深 (Color Depth)
大家都知乜嘢係三原色，熒幕上每一粒彩色點，其實係由三粒分別係紅/藍/綠色嘅細點組成。而呢三點可以組成幾多變化，就睇吓佢接收嘅signal有幾仔細，例如每隻色係由8-bits組成，即係每一點嘅色，會由00000000 (2進制)到11111111嚟表示，亦即係有2^8 = 256 咁多種變化，三隻色加埋，就會有256^3 =16,777,216咁多種變化。再高級啲嘅熒幕，每隻色有10-bits，咁可以有嘅變化為2^10^3 = 1,073,741,824，所以越高越好，不過一般notebook唔太disclose呢樣嘢。


10. 色準
呢個道理就簡單，即係原本係乜嘢色，熒幕show得返乜嘢色，就謂之準。準唔準要拎專門嘅hardware去試，一般人，就拎住部機個model，網上睇吓有冇其他人做過測試，參考返人哋結果就算。(當中有樣叫Delta E，呢個數值越低，就代表準確度越高。)


11. 調光方色
個熒幕好多時都唔需要開到最光，否則會好刺眼，睇到眼痛，但你有冇諗過，熒幕係點樣調暗？

Pulse-width modulation (PWM)調光：假設熒幕最光時，背光全時間發光(OLED嚟講，就係每粒像素全時間發光)，要暗啲咁點？咪將個背光開一下再關一下，如果頻率夠高，因為視覺殘留，人係感覺唔到佢閃，只係睇到暗咗，呢種就叫PWM調光。不不過咁做，始終對隻眼唔係咁好，因為視覺上覺得熒幕係暗，導致瞳孔放大，但當熒幕全光時，光線會大量射入視網膜。

DC調光：另一種方法，就係通過調較背光嘅供電電流或/及電壓(OLED就係每點咁調較)，嚟影響熒幕嘅光暗，因為直接由光源強度著手，所以唔會令人有閃光所導致嘅不適，不過成本較高。

題外話：有唔少電腦，會有個所謂Ambient Light Sensor，嚟感應環境光暗，再相應咁調較返你個螢幕嘅亮度。呢個function我一定閂鬼咗佢，因為佢個sensor感應到嘅光暗，同實際上我望住螢幕嘅方向相反，好多時都唔太準，個mon不斷被佢搞到忽光忽暗，好討厭。


12. 其他
其他仲有低藍光認證，HDR等等好多嘢可以講，不過好似已經太多嘢，就講到呢度算。



返去主頁


Copyright notice.
未經同意，請勿轉載！